Nafarroako Gobernuak ebazpenak aztertu ostean erabakiko du helegiteak jarri ala ez

Nafarroako Gobernuak "beharrezko erabakiak" hartuko ditu zerbitzu juridikoek "azterketa tekniko eta zorrotza" egiten dutenean, Nafarroako Justizia Auzitegiak euskarak Foru Administrazioan duen araudiaren artikulu batzuk bertan behera utzi ostean.

Horixe erantzun du Javier Remirez presidenteordeak, Gobernu bileraren ostean, ebazpenen kontra helegiteak aurkezteko asmorik ba ote dagoen galdetu diotenean, gobernukideen artean desadostasunak daudelako.

"Gobernuaren zerbitzu juridikoak azterketa teknikoa eta zorrotza egiteko unean gaude, eta ondorioen arabera erabakiko ditugu ekintza zehatzak. Hori da herritarrek Gobernu honetatik espero dutena: zorrotz, zentzuz eta profesionaltasunez jokatzea", berretsi du Remirezek, eszenatoki guztiak aztertzen ari direla gaineratu aurretik.

Ebazpena irmoa izanez gero, deialdi batzuei eragingo diela aitortu du presidenteordeak, nahiz eta ez duen zenbatekorik aurreratu, horixe baita aztertzen ari diren gaietako bat.

Gobernukideen arteko iritzi desberdintasunen inguruan galdetuta (PSN gustura agertu baita ebazpenekin eta gainerakoek helegitea jartzea eskatu dute), presidenteorde sozialistak azpimarratu du Gobernuak ez duela "politikoki baloratuko", eta hartuko duen erabakia "programa akordioan" oinarrituko dela.

EH Bilduk euskararen legea aldatzeko unea dela adierazi du eta, eskaera jakin horri erantzun gabe, programa akordioa aipatu du, aldaketari ez zaiola aterik ixten erantzuteko; baina, egitekotan, "errealitate linguistikoa" errespetatuz eta "adostasun zabalarekin" egingo litzatekeela gaineratu du.