Gizartea
Nafarroako Auzitegi Nagusia
Eremu misto eta ez-euskaldunean euskara meritutzat hartzeari uzteko agindu dute
Agentziak | Erredakzioa
Nafarroako Justizia Auzitegi Nagusiak aintzat hartu du UGTk euskararen foru dekretuaren aurka jarritako helegitea eta jakinarazpen publikoetan elebitasuna bultzatzen zuten artikuluak indargabetu ditu.
-
Nafarroako Auzitegi Nagusiko Administrazioarekiko Auzien Salak hartu du erabakia. Argazkia: Efe.
Nafarroako Justizia Auzitegi Nagusiak bertan behera utzi du euskararen foru dekretuan euskara meritutzat hartu beharra ezartzen zuen zatia, bete beharreko profila eskatzen ez duten lanpostuetan, eremu mistoan, ez-euskaldunean eta foru erkidegoaren Administrazioko zerbitzu zentraletako lanpostuetan, oposizio-lehiaketa bidez betetako postuei dagokienez. Kasazio helegitea soilik jar dakioke epaiari.
Ebazpenean, Administrazioarekiko Auzien Salak aintzat hartu du UGT sindikatuak eta Langile Administratiboen Sindikatuak ezarritako helegitearen zati bat, eta, hortaz, hau ezarri du: “Eremu mistoan eta zerbitzu zentraletan, bete beharreko profil bat eskatzen ez duen lanpostuetan, euskara meritutzat hartuta diskriminazioa egiten da Funtzio Publikoko lanpostuen hornikuntzan, eta hori ez dator bat hizkuntza balioztatzeko orduan kontuan izan beharreko arrazoizkotasun eta proportzionaltasun printzipioekin, gauzatu beharreko zereginei eta dagokion lurraldeko errealitate soziolinguistikoari begira meritu hori adierazgarria izan ez litekeen lanpostuetan”.
Halaber, magistratuek bertan behera utzi dituzte Administrazioaren zerbitzu zentralek euskararekin zituzten betebeharrak herritarrei egindako jakinarazpenetan, inprimaki eta idatzi ofizialetan, bulego eta langeletako idazkunetan, uniforme eta ibilgailuetan, oharretan, liburuxketan, iragarkietan, publizitatean eta errepideetako bide-seinaleetan.
Magistratuen arabera, herritarraren eskubidea da hizkuntza, eta ez Administrazioarena, eta azpimarratu dute zerbitzu publikoek herritar guztiei helarazitako mezuak izatearren dagoela inposatuta idazkera elebiduna bertan behera utzitako aginduetan.
Salako epaileek ezarritakoaren arabera, zerbitzu zentralen hizkuntza erregimena ez dagokio bere kokalekuari, ezpada dagokion hartzaileari eta berorren hizkuntza-eremuari. Hortaz, Auzitegiaren arabera, nahiz eta zerbitzu zentralek Nafarroa osoan jardun, Euskararen Foru Legeak hizkuntza-eremu bakoitzarentzat ezartzen duenari jarraitu behar diote.
