Italiako Justiziak 'Open Arms' ontziaren aurkako Salviniren debekua indargabetu du

Italiako Justiziak Matteo Salvini herrialdeko Barne ministroak sinatutako debekua indargabetu du, eta hortaz, Open Arms GKEren ontzia italiar uretan sartzeko aukera izango du; izan ere, auzitegiak ebatzi duenez, ontzia "zailtasun handiko egoeran" dago, eta bertan dauden pertsonek "premiazko laguntza behar dute". Dena dela, Salvinik erantzun du ondorengo orduetan beste ezezko bat sinatuko duela, ontziak ez izateko aukerarik Lampedusan atrakatzeko (oraingoz, ontziari ez diote porturik esleitu).

Lazioko Eskualde Auzitegi Administratiboren ebazpenaren arabera, "egoera guztiz larria eta premiazkoa da", eta, hortaz, justifikatuta dago une honetatik bertatik baimentzea ontzia Italiako uretan sartzea, xede izanik "salbatutako pertsonek, hala behar izanez gero, laguntza medikoa jasotzea".

Matteo Salvinik, baina, ezezkoa berretsi du: "Herrialde honetan, Lazioko Eskualde Auzitegi Administratiboko abokatu batek baimena eman nahi dio Italian porturatzeko migratzaileez betetako ontzi atzerritar bati. Nik, ondorengo orduetan, berriro sinatuko dut nire ezetza", esan du.

GKE abuztuaren 1etik dabil itxaroten baimena Europako portu seguru batean atrakatzeko; oraintxe, 147 migratzaile daude ontzian.

Camps: "Erabateko legaltasuna nahi dugu"

Ebazpena jakinarazita, GKEren sortzaile Oscar Campsek iragarri du berehalako ebakuazioa eskatuko duela ontzian dauden lagunen "mediku-arrazoiengatik"; hala ere, argitu du ez duela egingo ez badu Italiako agintarien baimena.

"Erabateko legaltasuna nahi dugu", aseguratu du; izan ere, ontziak italiar uretan nabigatzeko baimena du, baina falta zaio, oraindik ere, portu bat esleitzea.

Azaldu duenez, ontziak babesa bilatuko du Lampedusan, dagoen puntutik 30 miliatara, baldintza meteorologikoek okerrera egingo baitute. Campsek espero du irtenbidea ondorengo orduetan iristea, ez ondorengo egunotan.