Gizartea
Nafarroako Auzitegia
'La Manada'ko abokatu batek osteguneko saioa atzeratzea eskatu du
Agentziak | Erredakzioa
Agustin Martinez Becerrak atzerapena eskatu du, egun berean beste epaiketa bat duelako Sevillan. 'La Manada'ko lau zigorturen ordezkaria da.
-
Agustin Martinez Becerra abokatua. Argazkia: EFE
Agustin Martinez Becerra 'La Manada'ko lau zigorturen abokatuak osteguneko saioa atzeratzea eskatu du, egun berean beste epaiketa bat duelako Sevillan. La Manadako bost kideei bederatzi urteko espetxe-zigorra ezarri zieten, 2016ko sanferminetan emakume bati sexu-abusuak egiteagatik.
Nafarroako Auzitegiko Bigarren Sekzioak saioa datorren ostegunerako deitu du, Fiskaltzak 'La Manada'ko kideen espetxeratzea eskatu ondoren. Nafarroako Auzitegi Nagusiko Arlo Zibileko eta Zigor-arloko Salak bederatzi urteko kartzela-zigorra baieztatu zuen abenduaren 5ean.
Saio hori atzeratzea eskatu dio orain Martinez Becerrak Bigarren Sekzioari; izan ere, datorren ostegunean beste epaiketa bateko behin betiko ondorioak aurkeztu behar ditu Sevillako Zigor-arloko Epaitegian.
Hala ere, eskakizuna onartuko ez balute, Iruñeko saiora joango dela iragarri du abokatuak. Bost zigortuek Andaluziako hiriburutik bideokonferentzia bidez jarraituko dute bista.
