InSight espazio-ontzia Martera iritsi da

NASAren InSight espazio-ontzia gaur gauean iritsi da Martera, planeta gorriaren barrualdea ikertzeko asmoz.

Euskal Herrian 19:53 zirenean lurreratu da ontzia Marten, NASAk Pasadenan (Kalifornia) duen kontrolerako zentroak jakinarazi duenez.

"Sentitzen zaitut, Marte. Laster ezagutuko dut zure bihotza. Lurreratzearen ostean, hemen nago. Etxean nago", argitaratu dute InSight ontziaren Twitter kontuan.

Poztasunez, txalo zaparrada artean eta elkarri besarkadak emanez ospatu dute Pasadenako kontrol-zentroan bildutako teknikari eta zientzialariek espazio-ontzia Martera iritsi izana.

Lur hartu eta minutu gutxira jaso du NASAk InSight ontziak planeta gorrian egindako lehen argazkia.

Espazio-ontzia joan den maiatzaren 5ean atera zen Kaliforniako Vandenberg hegazkin-basetik, eta 485 milioi kilometroko bidaia egin du Martera heltzeko.

Aurretik egindako misioetan, Marteko azala eta atmosfera ikertu dituzte, baina oraingoan planeta gorriaren konposizioa aztertuko dute.

InSight ontziak planeta gorriaren barrualdeko jarduera eta tenperatura neurtuko ditu eta horretarako, besteak beste, bost metroko zuloa egingo du azalean.

My first picture on #Mars! My lens cover isn’t off yet, but I just had to show you a first look at my new home. More status updates:https://t.co/tYcLE3tkkS #MarsLanding pic.twitter.com/G15bJjMYxa

— NASAInSight (@NASAInSight) 2018(e)ko azaroaren 26(a)