Gazteluetako irakaslearentzat 20 hileko ordezko zigor eskaera egin du fiskalak

Gaztelueta auziko epaiketak azken eguna du gaur, eta aldeek euren ondorioak azaldu dituzte. Berrikuntza bakarra Fiskaltzaren eskutik etorri da. Epaiketa hasieran egindako kartzela zigor eskaeraz gain (hiru urtekoa), ordezko beste bat —20 hilabetekoa— proposatu du, epaia ezartzeko kontuan hartzen den Zigor Kodea gaur egun indarrean dagoena bada.

Leioako ikastetxe pribatuan ikasle bati ustez egindako sexu abusuengatik epaitzen ari dira J.M.S irakasle ohia. Harentzat hiru urteko kartzela zigorra eskatu du fiskalak, gertakariak jazo ziren garaian indarrean zegoen Zigor Kodea kontuan hartuta.

Horrez gain, gaur egun indarrean dagoen Zigor Kodea aplikatuta, ordezko beste zigor eskaera bat ere egin du Fiskaltzak. Epaiak azken eskaera hori kontuan hartuko balu, irakaslea ez litzateke espetxean sartu beharko, bi urte beherakoa baita.

Fiskalak frogatutzat jo du maisuak adingabeari sexu abusu jarraituak egin zizkiola, baina argudiatu du abusu larrienak —masturbatzen behartu zuela edota uzkitik boligrafo bat sartu ziola — ezin izan direla egiaztatu.

Akusazio partikularrak 10 urteko kartzela zigorra eskatu du akusatuarentzat, ikaslearengan zuen botereaz baliatuta sexu abusuak egin zizkiola frogatutzat jo baitu. Defentsak absoluzioa eskatu du.

Gaztearen aita: 'Semearen testigantza zalantzan jartzea nazkagarria da'

Epaiketara sartu baino lehen, adierazpenak egin ditu Gazteluetako ikasle ohiaren aitak. Horren ustez, epaitegiko adituen ondorioak "oso argiak eta irmoak" izan dira, beraz, semearen testigantza zalantzan jartzea "nazkagarria" da.

Aitak nabarmendu du epaileen lana "profesionala eta aseptikoa" izaten ari dela, eta ez duela "kexurik" horren kontura. "Epaiaren zain gaude orain", erantsi du.

Fiskaltzak bere eskaera molda zezakeela eta, aitak ez du ezer aurreratu nahi izan, baina hala gertatzekotan, fiskalek "azalpen asko eman beharko" dituztela ohartarazi du.

Gaztearen aitaren hitzetan, "gizarteak badaki, eta ez du inongo zalantzarik semeak esandakoa goitik behera egia dela. Egia argitara atera da".