Gizartea
Emakumeen Nazioarteko Eguna
Martxoaren 8an egun osoko greba deituko du Euskal Herriko mugimendu feministak
EITB.EUS
Batzarra egin zuten, atzo, Gasteizen, eta bertan erabaki zuten 24 orduko lanuztea deitzea 2019ko Emakumeen Nazioarteko Egunean.
-
Martxoaren 8ko mobilizazioa, Donostian.
'Emakumeok planto' goiburupean, Euskal Herriko lehen greba feminista egin da aurten, martxoaren 8an. Milaka eta milaka emakumek egin zuen bat lanuztearekin, eta berdintasunaren aldeko inoizko oihurik ozenena entzun zen mundu osoko 70 herrialde baino gehiagotan. Historikoa izan zen.
Mugarritzat jo zuen mobilizazioa Euskal Herriko mugimendu feministak, eta indar erakustaldi horri eusteko konpromisoa agertu zuen. Elkarte feministen lanak ez du etenik izan azken hilabeteotan, eta atzo asanblada egin zuten Gasteizen, aurrera begirako urratsak zehazteko. Twitter bidez iragarri zutenez, 2019ko martxoaren 8an egun osoko greba deitzea erabaki zuten batzarrean bildutako emakumeek.
Udazkenaren atarian gaudela gaur Gasteizen egin dugun Asanbladan Euskal Herriko Mugimendu Feministak erabaki du 2019ko martxoaren 8an greba feministara goazela. 24 orduko greba izango da. pic.twitter.com/tXcjtFSnf0
— Emakumeok* planto! (@M8EuskalHerria) 22 de septiembre de 2018
Datozen asteetan, auzo, herri eta hirietako emakume taldeekin batuko dira, batzarrean hartutako erabakiak partekatzeko, eta azaroaren 17an bilduko da berriro Euskal Herriko mugimendu feministaren talde orokorra Donostian, grebaren helburu eta eduki orokorrak adosteko.
Hurrengo asteetan herrialdeetan, herrietan, hirietan, auzoetan eta tokian tokiko asanbladetan elkarri xuxurlatuko diogu hurrengo pausuak zeintzuk izango diren. Hurrengo data, Azaroaren 17an, Donostian, 10:00etan. Bertan Grebaren helburu eta eduki orokorrak adostuko ditugu.
— Emakumeok* planto! (@M8EuskalHerria) 22 de septiembre de 2018
