Gizartea
Sexu gehiegikeriak
Sanferminetan abusuengatik aurkeztutako salaketetako bat faltsua da
EITB.EUS
Gaztelu plazako taberna batean ukituak jasan zituela salatu zuen emakume batek. Segurtasun kamerak aztertuta, halakorik ez zela gertatu frogatu ahal izan dute.
-
Milaka lagunek salatu zituzten atzo sanferminetako sexu erasoak. EFE
San Fermin jaietan sexu abusuengatik aurkeztutako salaketetako bat artxibatu dute gaur, faltsua dela frogatu eta gero. Joaquin Galve Nafarroako Auzitegi Nagusiko presidenteak egin du iragarpena RNE irrati-kateari eskainitako elkarrizketa batean.
Galvek azaldu duenez, emakume batek salaketa jarri zuen gizonezko batek ukituak egin omen zizkiolako. Gertaerak Iruñeko Gaztelu plazako taberna batean jazo omen ziren, larunbat gauean. Horrez gain, gehiegikeriengatik kargu hartu zietelako, beste gizon batek haren bikotekidea eta horren anaia kolpatu zituela esan zuen emakumeak.
Gertaeran nahasitako bi gizonak kartzelara bidali zituzten.
Gerora, baina, salaketa faltsua dela frogatu ahal izan dute. Izan ere, inguruko segurtasun kamerek hartutako irudiak aztertu dituzte, eta ukiturik ez zela egon ikusi dute.
Salaketa artxibatzeaz gain, emakumearen kontrako izapideak abiatu dituzte, delitu simulazioa eta legez kontrako atxiloketa egotzita.
