EH Bildu: 'Ez dago arazorik biktima guztien omenaldietara joateko'

Rebeka Ubera EH Bilduko legebiltzarkideak baieztatu duenez, koalizioa 128 alkatek egitekoa duten bileran -Urkulluk deituta- izango da, irailaren 4an, eta, halaber, ziurtatu du ez duela "inolako arazorik terrorismoaren biktima ororen" omenezko ekitaldietan izateko, EH Bilduren konpromisoa "irmoa" delako eta bere "erantzukizunez jokatzeko" helburua duelako.

Hala, koalizioak esan du Memoriaren Mapan lagunduko dutela "biktima guztiak aitortu eta kalte-ordainak emateko, eta guztiok hain sutsuki aldarrikatzen dugun elkarbizitza eraikitzeko".

Donostian egindako agerraldi batean adierazi duenaren arabera, koalizioaren kide diren alkateek eta kideek aipatutako ekitaldian parte hartuko dute, "erantzukizunez" jokatuta, "gure lana eta konpromisoa irmoa delako, orain arte bezala".

"Biktima guztiek merezi eta behar dute aitortuak izatea eta kalte ordainak jasotzea, gertatutakoa errepika ez dadin eta, horren ildotik, EH Bilduk ekarpena egiteko aukera izanez gero, bertan egongo da, helburua lortzeko", azpimarratu du.

Gainera, Aralarko idazkari nagusia ere den Uberak ziurtatu egin du koalizioak Memoriaren Mapan parte hartuko duela "dauden hutsuneak eta ahanztura betetzeko", "biktima batzuk aitortu eta beste batzuk ez badira aintzat hartzen, guztien duintasunaren kontra egiten da".