Gizartea
Izurritea Mendebaldeko Afrikan
Ebolak 900 pertsona baino gehiago hil ditu Afrikan, bost hilabetean
Erredakzioa
Bihar, Munduko Osasun Erakundeak (MOE) "nazioarteko larrialdi egoera" deitu edo ez iragarriko du.
-
Ebolaren aurkako prebentzio neurriak, Liberian. EFE
Albisteak (2)
Bideoak (2)
Informazio gehiago (1)
Mendebaldeko Afrika astintzen ari den ebola izurriteak 1.711 pertsona kutsatu ditu dagoeneko, eta, horietatik, 932 hil dira, Munduko Osasun Erakundeak (MOE) egindako azken balantzearen arabera. Izurritea martxoaren 22an atzeman zuten, Ginea Konakryn.
Abuztuaren 2tik 4ra, 108 kasu eta 45 heriotza atzeman dituzte ebola zabaltzen ari den lau herrialdeetan (Ginea Konakry, Liberia, Nigeria eta Sierra Leona).
Testuinguru horretan, MOEren Larrialdi Batzordea bildu egingo da gaur, "nazioarteko larrialdi egoera" deitu edo ez erabakitzeko. Bihar goizean iragarriko dute erabakia.
Nazioarteko larrialdi egoera deitzen badute, erakundearen adituek hartu beharreko neurriak ere adostuko dituzte. Bilera bideokonferentziaz egingo dute.
MOEko bozeramaileek kezka agertu dute, Mendebaldeko Afrikan biztanleek hainbat ohitura arriskutsu dituztelako, hala nola gorpuak besarkatzea eta garbitzea. Izan ere, horrek areagotu egiten du ebolaz kutsatzeko arriskua.
1976. urtean ebola lehen aldiz atzeman zutenetik, birusak 1.640 pertsona hil ditu mundu osoan, erdia baino gehiago azken bost hilabeteetan.
