Lanuzteak deitu dituzte Talgon, Renfek ezarritako isunarengatik langileen soldatak jaitsi egingo direlako

CSIF sindikatuak mobilizazioak eta lanuzteak deitu ditu Talgon, Renfek tren ekoizleari ezarri dion 116 milioi euroko isunaren ondorioz langileen soldatak jaitsi egingo direla salatzeko.

Sindikatuak ohar bidez jakinarazi duenez, langileen soldata aldagarrian izango du eragina aipaturiko isunak.

Eskatutako trenak agindutako epean ez egiteagatik ezarri diote isuna Talgori, baina izandako atzerapenak pandemiaren eta horniduran izandako arazoen ondorio izan direla argudiatu du sindikatuak.

Espainiako Gobernuak Talgo enpresa estrategiko izendatu zuen pandemian, eta horregatik CSIFek ez du ulertzen orain ondorioak langileek pairatu behar izatea.

Azkenik, sindikatuak Renferen kontra hitz gogorrak bota ditu, bilera eskatu arren ez duelako erantzunik izan.