Espainiako sei banku handienek 23.656 milioi irabazi dituzte urteko lehen bederatzi hilabetetan, % 20 gehiago

Ibex 35ean kotizatzen duten Espainiako Estatuko sei banku handienek —Santander, BBVA, CaixaBank, Sabadell, Bankinter eta Unicaja Bankua— 23.656 milioi euro irabazi dituzte 2024 urteko lehen bederatzi hilabetetan. Bankuen gaineko zerga indarrean egonda, inoizko irabazi handienak izan dituzte, iaz epe berean baino % 20 gehiago.

Santander Bankua da datu onenak bildu dituena, 9.309 miloi euroko irabaziekin, % 14 gehiago. Atzetik dago BBVA, aurrekaririk gabeko irabaziekin: 7.622 milioi, % 28 gehiago.

Rankinean hirugarren lekuan CaixaBank ageri da: % 16 egin dute gora finantza erakunde horren irabaziek, 4.248 milioi euroraino. Laugarren postua, berriz, Sabadellek du. Orain arteko markak hautsi ditu banku horrek ere, 1.295 milioi irabazita, % 26 gehiago. 2023 urte osoan bildutako irabazi kopurua berdindu du 2024ko lehen bederatzi hilabeteetan.

Azkenik, bosgarren eta seigarren postuan, Bankinter eta Unicaja daude, hurrenez hurren: lehendabizikoa, 731 milioi euro irabazita ( % 7) eta bigarrena, 451 milioi (% 58). Unicaja da sektorean gehien hazi den erakundea.

Bankuen gaineko zerga

Euzko Alderdi Jeltzaleak akordioa lortu zuen atzo Espainiako Gobernuarekin talde multinazionalei eta bankuei ezarritako zergak kontzertatzeko eta foru ogasunek kudeatu ditzaten. Beraz, bi zergok foru-zerga sistemetan sartuko dira eta Kontzertu Ekonomikoaren Batzorde Mistoaren bidez gauzatuko dira.