Bidaiari kopuruak gora egin zuen Bilboko Aireportuan eta behera Donostian eta Gasteizen, irailean

Aenak, asterartean, Euskal Herriko aireportuetako operazioek irailean eta 2024ko lehen bederatzi hilabeteetan izandako bilakaeraren berri eman du.

Datu horiei erreparatuz, Bilboko Aireportuak 663.116 bidaiarirekin itxi du hilabetea, hau da, % 5,1eko hazkundea izan du iazko hilabete berarekin alderatuta, eta Bizkaiko azpiegituran inoizko irailik onena izan da.

Bidaien sailkapenari dagokionez, etxeko bidaiari komertzialen kopurua % 3,7 igo da, 363.786 bidaiari izan baitira. Nazioarteko bidaiariak % 7,2 igo dira, eta 298.561 bidaiari izatera iritsi da.

Aire-operazioek, berriz, behera egin dute: 5.095 lurreratze- eta aireratze-mugimendu izan dira, 2023ko irailean baino % 0,4 gutxiago.

Aurtengo urtarriletik irailera bitartean, Bilboko aireportuak 39.862 mugimendu izan ditu, iazko epe berean baino % 2,3 gehiago.

Bidaiariei dagokienez, aireportuak 5.177.706 bidaiari erregistratu ditu aurten, 2023ko lehen bederatzi hilabeteetan baino % 7,8 gehiago.

Jaitsiera Donostian

Donostiako Aireportuak 47.120 bidaiari izan zituen irailean, aurreko urteko hilabete berean baino % 2,4 gutxiago.

Lurreratze- eta aireratze-operazioen kopurua 584ra iritsi zen irailean, duela urtebete baino % 6,4 gutxiago.

Urtarriletik irailera, 4.650 mugimendu egin ziren, iazko epe berean baino % 3 gutxiago.

Urteko lehen bederatzi hilabeteetako bidaiarien trafikoak positibo izaten jarraitzen du. 367.086 bidaiari izan dira, 2023an irailaren 31ra arte batutakoak baino % 0,3 gehiago.

Beherakada Gasteizen

Guztira, 202.354 pertsonak erabili dute Gasteizko Aireportua urtarriletik irailera bitartean, hau da, 2024ko lehen bederatzi hilabeteekin alderatuta, % 18,7ko jaitsiera izan da.

Urteko lehen bederatzi hilabeteetan, Forondak 561 tona merkantzia mugitu zituen karga-instalazioetan, 2023ko epe berean baino % 1,9 gutxiago.

Guztira, 10.669 lurreratze- eta aireratze-mugimendu izan ziren urtarriletik, hau da, kopuruak % 2,8 egin du behera, iazko aldi beraren aldean.

Irailean, berriz, 25.264 bidaiarik erabili zuten Arabako Aireportua, 2023ko hilabete berean baino % 18,1 gutxiagok.