Bilboko Gurutze Gorriko Ospitaleko langileek hiru greba egun egingo dituzte gaurtik aurrera

Bilboko Gurutze Gorriko Ospitaleko langileek gaur egingo dute ELA sindikatuak deitutako hiru greba egunetako lehena. Gaur, bihar eta etzi daude deituta lanuzteak. 100 pertsona inguruk egiten dute lan bertan.

Bilboko Gurutze Gorriak Osakidetzarentzat egiten du lan, eta bere jardueraren % 90 osasun publikoak azpikontratatuta dago. Hala ere, "lan-baldintzak Osakidetzarenak baino okerragoak dira. Urteak daramatzate erosteko ahalmena galtzen eta lanaldi luzeagoa dute. Gainera, zuzendaritzak atzerapausoak proposatu ditu hitzarmena berritzeko", ELA sindikatuak azaldu duenez.

Hori dela eta, goizean manifestazioa egingo dute Basurtuko Ospitaletik abiatuta, Gurutze Gorriaren aurrean amaitzeko (Urkixo zumarkalea, 65), eta manifestari batzuk gurpil-aulkiarekin joango dira, langileen egoera irudikatzeko.