Diazek bilerara deitu ditu sindikatuak langabeziako sorospena negoziatzeko eta gutxieneko soldata igotzeko

Diputatuen Kongresuak langabeziako sorospena erreformatu behar zuen dekretua bertan behera utzi ostean, Yolanda Diaz Espainiako Gobernuko bigarren presidenteorde eta Lan eta Ekonomia Sozialeko ministroak iragarri du erreforma agente sozialekin negoziatuko duela, eta horretarako bilerara deitu ditu biharko. Batzarrean, orobat, lanbide arteko gutxieneko soldataren igoera ere adostu nahi du Lan Ministerioak. 

"Ostiral honetan gutxieneko soldataren igoera itxiko dugu Eztabaida Sozialerako Mahaian, eta akordioa gauzatuta, agente sozialak berehala deituko ditugu (langabeziako sorospenaren) erreforma denboraz negoziatzeko, oso positiboa baita gure herrialdearentzat", adierazi du Namurren (Belgika), EBko Lan eta Politika Sozialeko ministroen bilera batean dela. 

Lanbide arteko gutxieneko soldatari dagokionez, Lan Ministerioak % 4ko igoera proposatu die aldeei, eta sindikatuek % 5ekoa. CEOE patronalak iragarria du akordiotik kanpo geratuko dela. Diaz bi aldeekin bildu zen astelehenean, baina antzua izan zen batzarra. Are gehiago, Lorenzo Amor CEOEko presidenteordeak batzarraren ondotik iragarri zuenez, patronala "ez da akordiora bilduko", eta Gobernua "xantaia" egiten ari dela salatu zuen. 

"Eztabaida Sozialerako Mahaiaren hurrengo bilerara joango gara, baina emaitza baduzue. Guk ez dugu xantaiarik onartuko. Eztabaida sozialean mehatxuek eta xantaiek ez dute lekurik", azaldu zuen. 

Langabeziarako sorospenaren erreforma, mahai gainean

Langabeziako sorospenaren erreformari dagokionez, Lan ministroak gogorarazi du Eztabaida Sozialerako Mahaian eztabaidatu ezinda utzi zutela, exekutiboak abenduaren 31a baino lehen onartu behar zuelako (Europako Generation Next funtsen laugarren zatia, 10.000 milioi euro, kobratu ahal izateko). 

"Orain bai, Eztabaida Sozialerako Mahaian aztertuko eta negoziatuko dugu", aldarrikatu du.

Atzoko bozketan Podemosek izan zuen jarreraz galdetuta, Diazek salatu du koalizio moreak langileak "kolpatu" dituela, "PP eta Vox lagun hartuta": 

0:32

Diazek esan du Podemosek ''langileak kolpatu'' dituela, ''Vox eta PP lagun hartuta''