Arabako Foru Aldundiak 2024rako aurrekontu proiektua erretiratu du eta aurtengoak luzatuko ditu

Arabako foru gobernuak 2024rako aurrekontu proiektua erretiratu du eta, hortaz, aurtengo aurrekontuak luzatuko ditu. Izan ere, gutxiengoan dagoen gobernuak ez du babes nahikorik lortu aurrekontuak onartzeko.

Ramiro Gonzalez Arabako ahaldun nagusiak eta Itziar Gonzalo Ogasun eta Finantza diputatuak agiri bat bidali dute Batzar Nagusietara, foru gobernuak 2024rako aurrekontu proiektua erretiratu egiten duela jakinarazteko.

EAJk eta PSE-EEk osatutako foru gobernuak, gutxienez, oposizioko alderdi baten babesa behar zuen aurrekontuak onartzeko.

Atzo, Elkarrekin koalizioak iragarri zuen aurrekontu proiektuaren kontrako botoa emango zuela, foru gobernuarekin lortutako aurreakordioa baztertu egin zutelako koalizioa osatzen duten alderdiek. Ildo beretik, PPk aurrekontuen aurkako jarrera adierazi du. Gauzak horrela, babes nahikorik ez zuela jakitun, aurtengo kontuak luzatuko ditu Ramiro Gonzalez buru duen gobernuak.