Bilboko Portuak 80 bidaiari-ontzi eta ia 150.000 bisitari hartu ditu denboraldi honetan

Bilboko Portuak 80 bidaiari-ontzi jaso ditu, 148.791 bidaiari guztira, "denboraldi bikainean", eta, bigarren urtez jarraian, "marka hautsi da geldialdiei eta bidaiariei dagokienez", Portuko Agintaritzak azpimarratu duenez.

Ricardo Barkala Bilboko Portuko Agintaritzako presidenteak denboraldi honen balorazio positiboa egin du, eta Bilbok "itsas bidaien ontzi-enpresa handien ibilbidean" jarraitzen duela nabarmendu du.

2019an, 50 ontzi iritsi ziren Bilboko Portura; 2020an, covid-19aren ondorioz, bertan behera gertatu ziren bidaiak; 2021eko abuztuan, trafiko horri berriro ekin, eta 14 geldialdi egon ziren; 2022an, berriz, bidaiari gutxiko ontziekin hasi ziren, eta 78 itsas bidaien kopuru errekorra lortu zuten, aurten gainditu dena.