Ekonomia
Bilera Bilbon
EBko Kontsumo eta Industria ministroek Europako industriaren autonomiaz eztabaidatuko dute Bilbon
Agentziak | EITB Media
Bilera informala egingo dute Euskaldunan gaur eta bihar hiru saiotan banatuta, eta, erabakirik hartuko ez bada ere, 2020-2025 Kontsumitzaileen Agendari eta Europako industriaren garapenari eta autonomiari buruz eztabaidatuko dute.
-
Euskalduna Jauregia. Argazkia: Euskalduna Jauregia.
Europar Batasuneko herrialdeetako Kontsumo eta Industria ministroek Kontsumitzaileen 2020-2025 Agendari eta Europako industriaren garapenari eta autonomiari buruz eztabaidatuko dute Bilboko Euskaldunan, gaur eta bihar egingo duten bilera informalean.
Europako industriak Batasunaz kanpoko herrialdeekiko, batez ere Txinarekiko mendekotasuna agerian geratu zen koronabirusaren pandemiarekin eta, ondoren, horniduren krisiarekin, bereziki txipenarekin, baita Txinako portuetan izandako arazoengatik nazioarteko logistikaren krisiarekin eta Suezko kanala blokeatu zuen zamaontziaren gertakariarekin.
Gorabehera horiek guztiek arazo ugari eragin zizkion Europako industriari, eta horrek ekoizpena geldiarazi zuen lantegi askotan, batez ere orain Europan ekoizten ez diren bateria eta lehengai berriak eskatzen dituen elektrifikaziorako trantsizioari aurre egin behar dion automobilgintzaren sektorean.
Horri guztiari buruz hitz egingo dute 27etako Industria ministroek "Kontsumo eta Industria eta Barne Merkatuko Ministroen Bilera Informalean", hori bai, inongo erabakirik hartu gabe.
Iragarrita dagoenez, 27etako Kontsumo eta Industria ministroek parte hartuko dute, baita Alberto Garzon Espainiako ministroak eta Jose Manuel Albares Espainiako Kanpo Arazoetako eta Europar Batasuneko titularrak ere, anfitrioi gisa. Didier Reynders Justizia komisarioa izango da Europako Batzordeko ordezkaria du Kontsumo eta Industriari buruzko topaketa horretan.
