Garoñako zentral nuklearra eraisteko baimena eman du Espainiako Gobernuak

Trantsizio Ekologikorako eta Erronka Demografikorako Ministerioak (MITECO) baimena eman du Santa Maria de Garoñako zentral nuklearra eraisten hasteko, ministro agindu baten bidez. Agindu horrek baimena ematen du, halaber, Nuclenorren instalazioaren titulartasuna Enresari eskualdatzeko, azken hori izango baita eraispenaren arduraduna.

Proiektuak – aldeko txostena egin zuen maiatzean Segurtasun Nuklearreko Kontseiluak – bi fase ditu, 2033ra arte iraungo du, 475 milioi euroko aurrekontua du, eta 350 pertsonak aldi berean lan egitea aurreikusten du.

Tobalinako haranean (Burgos), Garoñak 466 MWko potentzia instalatua zuen, 1971n inauguratu zuten eta sare elektrikotik deskonektatu zuten 2012ko abenduan, Nuclenorrek Industria, Energia eta Turismo Ministerioari ustiatzen ez jarraitzeko erabakiaren berri eman zionean.

2013ko uztailean, ustiapenaren behin betiko amaiera deklaratu zuten, baina ez segurtasun nuklearreko edo babes erradiologikoko arrazoiengatik; beraz, Nuclenorrek baimena berritzeko eskaera aurkeztu zuen 2014ko maiatzean. Azkenik, 2017ko abuztuan, eskaera hori ukatu egin zuen Energia, Turismo eta Agenda Digitaleko Ministerioak.

Bi faseko proiektua

Une horretan hasi zituen Enresak desegitea prestatzeko lanak, eta bi faseko proiektua diseinatu zuen.

1. fasean (2023-2026), turbina eraikinaren sistemak, egiturak eta osagaiak desmuntatuko dira, eta ondoriozko hondakinak kudeatzeko behar diren sistemak eta instalazioak aldatuko dira. Era berean, gastatutako erregaia putzutik zentraleko aldi baterako biltegira (ATI) eramango da.

Ondoren, 2. fasean (2027-2033), erregaia ATIn dela, izaera erradiologikoko eraikinen azken eraisteari ekingo zaio, deskontaminazioekin, desklasifikazioekin eta eraispenekin jarraituta, eta, azkenik, kokalekua lehengoratzearekin amaituko da.