Segurtasun Sailak agenteak "diskriminatu" eta "utzikeriaz" tratatzen ditu, Ertzaintzaren sindikatuen ustez

Eusko Jaurlaritzak ertzainak "diskriminatu" eta "utzikeriaz" tratatzen dituela salatu dute Radio Euskadiren "Boulevard" saioan ErNE, ESAN, Euspel eta SiPE sindikatuetako ordezkariek, eta ohartarazi dute Frantziako Tourra EAEn abiatuko dela baliatuko dutela euren aldarrikapenak egiteko. 

"Tourra aldarrikapen tresna gisa baliatzea da kontua", azaldu dute. Sindikatuok ez dute "boikot" hitza aipatu, baina tankerako horretako ekitaldiek arazo estrukturalak dituztela azpimarratu dute. 

"Ertzaintzak indar bidez" mugimenduaz galdetuta, Roberto Seijo (ErNE), Unai Garabieta (ESAN), Joseba Saralegi (Euspel) eta Juan Carlos Sainz (SiPE) ordezkariek iritzi ezberdinak azaldu dituzte. Euspelen eledunak plataformarekin "identifikatuta" sentitzen dela esan du; beste muturrean agertu dira ErNE, ESAN eta SiPE, eta ordezkari sindikal batzuen aurka izandako mehatxuzko jarrera salatu dute. 

Sindikatuetatik kanpo eratutako mugimendu horrek manifestazioa egin zuen atzo, igandearekin. Izan ere, ostiraletik harremanak etenda dituzte bi aldeek. Ostegunerako, gainera, beste protesta bat antolatu dute Legebiltzarraren aurrean.