Bankuen laguntzen inguruan bermeak eskatu dizkio Finlandiak Espainiari

"Herrialde batek bakarrik eskatu ditu bermeak, eta dagoeneko hasi gara lanean horiek eskaini ahal izateko. Edonola ere, bermeek ez dute betekizunen % 100 bete behar. Finlandia Eurogunearen % 2 baino gutxiago da, eta bermeek ez dute zertan herrialde horrek eskaintzen duen laguntzaren zenbateko osoa bete'', azaldu du ministroak.

Epeak

"18 hilabetean egingo dituzte 100.000 milioi euroko laguntzaren ordainketak. 30.000 milioi euroko lehen ordainketa hilaren bukaeran egingo dute'', esan du De Guindosek.

Espainiari 30.000 milioi euroko laguntza aurreratzea adostu zuen bart Eurotaldeak, Espainiako bankuen arazorik larrienak konpondu ahal izateko.

Maileguak itzultzeko, 12,5 urte izango ditu batez beste Espainiak, eta gehienez 15 urte.

Bonuak eta ''banku txarra''

Bonuen bitartez jasoko dute laguntza bankuek, likidezia lortu ahal izateko bonu horiek Europako Banku Zentralera igorri ondoren.

Halaber, bankuei baldintza gogorrak ezarriko dizkiete. Hori horrela, higiezinekin lotutako aktiboak, aktibo "toxiko" deritzenak, saldu egin beharko dituzte eta eratuko den "banku txar" batean sartu.