Kamioientzako zaintzapeko aparkalekuak: segurtasuna ala gastua?

Sarritan entzun dugu azkenaldi honetan garraio sektorean langileak falta direla, kamioilarien bizimodua oso gogorra dela eta dituzten lan-baldintzak gero eta eskasagoak direla. Azken finean, lanbide honek ez omen ditu gazteak erakartzen, eta erreleboa falta dela diote adituek, batik bat, nazioarteko garraioan.

Kamioilari askoren arduretako bat segurtasun falta da. Kamioiaren erregai-tangatik gasolioa lapurtzea ohikoa bilakatu da Europa osoan. Horrez gainera, garraiolariei eraso egiten dieten eta merkantziak osten dizkieten gaizkile-taldeak ugaritu egin dira. Hain zuzen ere, Espainiako Kargatzaileen Elkarteak (ACE) argitaratutako txosten baten arabera, Europan, Alemanian, Frantzian, Erresuma Batuan eta Espainian izaten dira eraso gehien.

Ondorioz, atseden luzeak hesiekin itxita dauden eta zaintza-zerbitzua eskaintzen duten aparkalekuetan egitea eskatzen diete garraio enpresa askok kamioilariei. Aseguru-etxeek ere baldintza gisa jartzen dute horrelako lekuetan gaua pasatzea, batik bat garraiatzen duten merkantzia lapurrentzat erakargarria denean.

Gure errepideen inguruetan, horrelako hainbat geraleku daude, besteak beste, Castejonen, Imarkoainen, Ribabellosan, Gasteizen, Zierbenan, Trapagaranen, Irunen, Oiartzunen edota Astigarragan. Azken horrek Astigarragako Mowiz Truckek, ESPORG elkarteak ematen duen kamioientzako Europako aparkalekurik onenaren saria jaso du duela gutxi.

Kamioientzako zaintzapeko aparkalekuen mapa. Irudia: EITB Media.

Geraleku hauetako bezero gehienak distantzia luzeak egiten dituzten garraiolariak izaten dira, etxetik kanpora egun ugari segidan pasatzen dituztenak. Hori dela eta, segurtasunaz gainera, bizimodua erosoagoa egingo dien zerbitzuak bilatzen dituzte askok: dutxak eta komun erosoak, garbigailuak, supermerkatua, jatetxea, lotarako lekua, telebista ikusteko edo bideo-jokoetan aritzeko espazioak, Interneteko konexioa, kirola egiteko azpiegiturak…

Hotelak bezala, geraleku hauek ere eskaintzen dituzten zerbitzuen arabera sailkatzen dira, lau kategoriatan: brontzezkoak, zilarrezkoak, urrezkoak eta platinozkoak. Hurrengo urteetan, Europa osoan zehar, zaintza zerbitzua eskainiko duten aparkalekuen sarea eraikitzeko asmoa dute Europako erakundeek eta ESPORG elkarteak, garraiolariei segurtasuna eta erosotasuna bermatzea eta gazteak lanbide horretara erakartzea helburu hartuta.

Kamioilarien iritzian, baina, aparkaleku horiek ez dira eurentzat konponbidea. Europara bidean, gure lurra zeharkatzen dutenei ondo etor dakiekela uste du Agustin Aranburu kamioilari hernaniarrak, baina berak, etxera datorrenean, kamioia modu seguruan aparkatzeko lekua behar du. "Gure herrietan kamioientzako plaza gutxi dago", erantsi du. Horren hitzetan, Tolosak eta Zarautzek udal aparkalekuak dituztela, baina salbuespenak dira.

Horrez gainera, zaintzapeko aparkaleku asko oso garestiak dira, horren ustez. "Gaur egun, autonomo batek ez du marjinarik gau batean horrelakoetan gelditzeko", azaldu du. Frantziara egiten dituen bidaietan, autobideetako atsedenlekuetan edota aparkaleku handiak eta seguruak dituzten jatetxeetan gelditzen da Agustin. "Horrelako makinak ezin dira edozein lekutan utzi, eta Europan bertan ere ez dago kamioilari guztiontzako behar adina leku", salatu du.