Apirilaren 3an hasiko da errentaren kanpaina Gipuzkoan

Eider Mendoza Gipuzkoako Foru Aldundiko bozeramaileak iragarri duenez, autolikidazio proposamenak martxoaren 29an egongo dira ikusgai eta apirilaren 3an hasiko da zergadunek beren errenta-aitorpena onartu ahal izateko epea.

Gobernu Kontseiluaren osteko prentsaurrekoan, Mendozak zehaztu du martxoaren 29an autolikidazio proposamenak ikusgai egongo direla Zergabidea plataforman, eta foru erakundea postaz bidaliko dituela herritarren etxeetara. Apirilaren 3an hasiko da proposamenak onartzeko epea. Era berean, apirilaren 12an Internet bidezko modalitatea hasiko da, Zergabidearen bitartez.

Apirilaren 13an, Ogasuneko bulegoetan aldez aurretik hitzordua eskatzeko epea irekiko da, foru-langileen laguntzarekin aitorpena aurkezteko. Apirilaren 17an Ogasunaren bulegoak irekiko dira eta, azkenik, ekainaren 30ean 2022ko Errentaren kanpaina amaituko da.