CAFek 55 milioi euroko etekina lortu zuen 2022an, aurreko ekitaldian baino % 38 gutxiago

CAF konpainia gipuzkoarrak 55 milioi euroko etekin garbia lortu zuen 2022an, hau da, % 38ko jaitsiera aurreko ekitaldiko emaitzarekin alderatuta, enpresak inflazioari eta osagaien eskasiari egozten diena.

Konpainiak bere urteko emaitzak publiko egin ditu gaur, eta salmenten hazkunde "garrantzitsua" nabarmendu du, "kontratazio maila historikoarekin", baina horrek ez du eragotzi testuinguru ekonomikoak, inflazioak batez ere, bere irabaziei eragitea.

CAFek Balore Merkatuaren Batzorde Nazionalari bidalitako dokumentuan azaldu duenez, inflazioak soldata eta lehengaien kostu igoerak ekarri ditu, eta, horrez gain, "energia nabarmen garestitu da", 2021arekin alderatuta % 250.

Trenbideen sektorean salmentak % 11 igo dira, 2.469 milioira iritsi arte; autobusen sektorean, berriz, % 3 jaitsi dira eta 696 milioira heldu dira, hornidura-katean izandako zailtasunek "hasieran aurreikusitako autobus-bolumena entregatzea eragotzi dutelako".

Eskaera-zorroa % 37 handitu da, 13.250 milioi euroko marka lortu arte; horietatik 12.301 trenbide-negozioari dagozkio (% 39 gehiago) eta 949 autobus-negozioari (% 21 gehiago).