Euriborrak igoera moteldu du azaroan, eta % 2,829an dago

12 hilabeterako euriborrak gora egiten jarraitu du 2022ko irailean, eta batez besteko maila % 2,829koa du. Urriko zifrarekin alderatuta, 0,2 puntu egin du gora, baina moteldu egin du gorakada.

Tasa aldagarriko hipoteka gehienak indize horrekin lotuta daude espainiar Estatuan. Urrian, % 2,629an zegoen, 0,393 puntu hazita. Urtarriletik azarora artean, euriborraren gorakada 3,3 puntukoa da, eta 2008ko abendutik izandako maximoetan jarraitzen du; orduan, % 3,452an zegoen.

Hileko itxiera % 2,8koa dela baieztatuz gero, pertsona batek baldin badu 30 urterako 150.000 euroko hipoteka aldagarria, diferentziala % 0,99 eta euriborra izanik, hipoteka kuotan 251 bat euroko hazkundea izango du; alegia, hilean 448 euro ordaindu beharrean, 700 euro ordainduko lituzke, berrikusketa eginda. Urtean, 3.000 euro gehiago.

Hipoteketan, % 4ko gorakada

Bitartean, etxebizitza erosteko hipoteketan gorakada izan da 19. aldiz jarraian; hain zuzen, % 4ko hazkundea. 44.119 mailegu sinatu dituzte. 2010etik honako irail guztiei erreparatuta, 2022koa onena izan da, Estatistikako Institutu Nazionalak asteazkenean argitaratutako datuen arabera.

Mailegu horien batez besteko zenbatekoak, urte arteko alderaketan, % 0,5 egin du gora, 143.222 euroetaraino. Aurreko hilabetearekin alderatuta, % 1,4 jaitsi da. Entitateek mailegatutako kapitala 6.318 milioi eurokoa izan da, aurreko urtean baino % 4,6 gehiago, eta abuztuan baino % 18,4 gehiago.