SMS bidez errentaren ordainketa simulatzen ari direla ohartarazi du Gipuzkoako Ogasunak

SMS mezuen bidez iruzurra egiten ari direla ohartarazi du Gipuzkoako Ogasunak: "errenta aitorpenaren ordainketa simulatzen ari dira".

Foru erakundeak ohar batean azpimarratu duenez, "Gipuzkoako herritar batzuek mota horretako jakinarazpenak jaso dituzte telefono mugikorretan, azken egunetan".

Ogasunak erantsi duenez, mezuaren igorleak "zerga administrazioaren plantak egiten ditu, eta errenta aitorpenaren ordainketa egiteko esteka bat ematen du".

Gipuzkoako Foru Ogasunak iruzur saiakeraren aurkako neurriak hartu ditu dagoeneko. Gogorarazi duenez, "erabiltzaileen prebentzioa neurririk onena da, datu pertsonalak eskatzen dituzten jakinarazpen susmagarrien aurrean".

Foru erakundeak ez ditu zergapekoen informazio konfidentziala, kontu zenbakiak edo txartel zenbakiak SMS bidez eskatzen, nabarmendu du.