Gipuzkoako Foru Aldundiko garbitzaileek greba mugagabea hasi dute

Gipuzkoako Foru Aldundiaren egoitzak eta lokalak garbitzen dituzten Eulen enpresako langileek greba mugagabea hasi dute astelehen honetan soldata KPIren arabera igotzea aldarrikatzeko. ELA, LAB eta ESK sindikatuek adierazi dute lanuztearen jarraipena zabala izan dela protestaren lehen egunean.

"Administrazioak eta Eulenek jarritako oztopoen gainetik, beharginek planto egin dute eta kalera atera dira lan-baldintza hobeak lortzeko", azaldu dute ohar batean.

Lan-hitzarmena negoziatzen ari dira, baina elkarrizketak 2021eko abendutik blokeatuta daudela salatu dute. Sindikatuen esanetan, enpresaren azkeneko proposamena hau izan zen: 2021eko soldata izoztea; eta 2022koa eta 2023koa % 1,5 eta % 1,75 igotzea, hurrenez hurren.

Halaber, "lan-gatazka honi irtenbidea emateko akordio batera heltzeko borondate politikoa erakuts" dezala eskatu diote sindikatuek Aldundiari.