Rajoy: 'Ez dago dirurik zerbitzu publikoei erantzuteko'

Mariano Rajoy Gobernuko presidenteak hezkuntza eta osasun arloko murrizketak defendatu ditu, eta herritarrek eskatzen zaien ahalegina ulertuko duten itxaropena du. ''Momentu honetan ez dago zerbitzu publikoei erantzuteko dirurik'', esan du Rajoyk.

Bogotan esan ditu hitzok, Juan Manuel Santos Kolonbiako presidentearekin egin duen agerraldian.

Rajoyk aitortu du ''gogorra'' dela herritarrei ahalegina eskatu behar izatea; baina, ''beharrezkoa eta ezinbestekoa'' dela azaldu du, ''azken urteotan gehiegi gastatu baita''.

"Ez dago beste aukerarik. Egoera latz hau gainditzeko pasaportea dira erreformak. Egoera oso zail bati egin behar zaio aurre, eta zerbitzu publiko horiek etorkizunean finkatu'', azpimarratu du.

Gaur bertan onartuko ditu Ministroen kontseiluak osasun eta hezkuntza arloko murrizketak, 10.000 milioi euro aurrezteko helburuarekin.