Nafarroako ostalariek 1.782 laguntza eskaera aurkeztu dituzte egun batean

Nafarroako ostalariek egun batean 1.782 laguntza eskaera aurkeztu dituzte fakturazioa galtzeagatik, Javier Remirez presidenteordeak azaldu duenez.

Nafarroako Gobernuaren laguntza berri bat da, 20 milioi eurokoa eta, gehienez, 25.000 eurokoa establezimendu bakoitzeko, eta hilaren 15era arte eska daiteke.

Remirezek gogorarazi du ez duela axola zein ordenatan egin diren eskaera horiek, eta zehaztu du atzo 255 eskabidetan arazoak izan zirela, eta dagoeneko harremanetan jarri direla interesatuekin.

Presidenteordeak ostalaritza sektorearekin egiten ari den "ahalegina" azpimarratu du, pandemiak gehien kaltetu duenetako bat baita, eta, horren harira, adierazi du guztira 75 milioi euro inguru jaso dituela sektoreak Nafarroako eta Estatuko laguntza zuzen eta zeharkakoetan.

"Datuak direnak dira", zehaztu du, baina egoera ikusita, sektoreak Gobernua kritikatzea ulertzen duela esan du.