Ostalariek protesta egingo dute, "ezintasuna eta beldurra" sentitzen dituztelako

SOS Ostalaritza plataformako kideek Hego Euskal Herriko lau hiriburuetan protesta egitera deitu dute larunbat honetan, ostalaritza sektorea “desagertzeko arriskuan” dagoela salatzeko.

Mobilizazioak 17:30 aldera abiatuko dira Donostiako Boulevard zumarditik, Gasteizko Bilbo plazatik, Iruñeko Gazteluko plazatik eta Bilboko Moyua plazatik.

Urko Manzano Sustrai tabernako (Getxo, Bizkaia) jabeak elkarrizketatu du eitb.eus-ek. Sektoreari murrizketa gehiago ezartzea espero zutela onartu du Manzanok, baina ez itxiera. Ordutegiak edo aforoak gehiago mugatzea espero zutela azaldu du tabernariak.

Eusko Jaurlaritzak hartutako erabakiaren aurrean, ostalariak "ezintasuna, zalantza eta beldurra" sentitzen ditu. Manzanoren hitzetan, "ez dakigu bihar zer gertatuko den, zein izango den irtenbidea, aldi baterako erregulazioa bai ala ez, inolako dirulaguntzarik aurreikusi gabe erabakia hartu dutelako".

Asteburuko mobilizazioei begira, hornitzaile, ekoizle eta bezero askok manifestazioekin bat egingo dutela uste du Manzanok; izan ere, sare sozialetan parte hartzeko deiak egiten ari dira.

Sutrai tabernako jabearen ahotan, pandemiaren zortzi hilabete igarota eta COVID-19aren aurkako neurri politikoen emaitza eza ikusita, "herritarrak eta ostalaritza egoeraren erantzule" egin dituzte. Ostalaria eta herritarra "erruduntzat" jo dituzte, erantsi duenez. "Osasun krisia hasi zenetik zortzi hilabete igaro dira dagoeneko, eta ez dute Osakidetza sendotu, ez dituzte bilatzaile gehiago lanean jarri…", gogorarazi du. Zentzu horretan, erakundeei "seriotasun falta" egotzi die Manzanok.

COVID-19aren krisiak gehien astindutako sektoreetako bat da ostalaritza. SEA Ostalaritza, Bizkaiko Ostalarien Elkartea eta Gipuzkoako Ostalaritzako presidenteek azpimarratu dutenez, sektoreak 60.000 lanpostu ditu, eta "% 25 desagertuko dira erreskate neurriak berehala martxan jarri ezean".

"Panorama atsekabegarria da. Jendea oso kezkatuta dago. Etorkizunean ziurgabetasuna da nagusi", adierazi du Carlos Sobron SOS Ostalaritza Arabako bozeramaileak Radio Euskadin. "Beste herrialde batzuetan egin bezala, dirulaguntza zuzenak" ematea eskatu du Sobronek.

Hector Sanchez Bizkaiko Ostalaritza Elkarteko kudeatzaileak Radio Euskadin nabarmendu duenez, taberna eta jatetxeek "gauzak ondo" egin dituzte birusa hedatzea saihesteko. "Ez dago datu zehatzik esateko ostalaritza ixtea dela arazoaren konponbidea. Katalunian 15 egun daramatzate itxita eta kutsatzeak ez dira txikitu; Madrilen, aldiz, hobera egin du osasun egoerak, eta ez dituzte tabernak zarratu", azaldu du.

"Guretzat, osasun arlotik zaila da erabaki batzuk eztabaidatzea, baina plan zehatz bat eskatzen dugu. Ez du balio esatea laguntzak aztertuko dituztela, horrek denbora eskatzen duelako eta sektoreko profesionalek ordainketei aurre egin behar dietelako", kritikatu du.

Era berean, uste du itxiera larunbat baterako ezartzea "Jaurlaritzaren sentsibilitate faltaren beste adibide bat" dela. "Ixtea erabakitzen bazen, neurria astelehenetik aurrera ezartzea eskatzen genuen guk, horrela astebururako salgaiak erosita zituzten horiek ez dituzte zakarrontzira bota beharko", deitoratu du.

Azkenik, azpimarratu du orain arte eskaini dizkieten finantzazio lerroak ez direla lagungarriak, "gehiago zorpetzea" dakartelako. Are gehiago, bankuek maileguak ematen ez dituztela salatu du, "ostalaritzako balantzeek ez dituztelako estandarrak betetzen".

Pertsona bat, itxitako taberna baten aurrean, Gasteizen. Argazkia: EFE

Mikel Aiestaran Gipuzkoako Ostalaritza Elkarteko Kudeaketa zuzendariak Euskadi Irratian aitortu duenez, erabakiarekin "etsita eta haserre" daude, eta askorentzat  "azken kolpea" izango dela nabarmendu du. Izan ere, Gipuzkoako ostalarien ustez, epe motzera 1.000 lokal itxiko dituzte, eta lanpostuen % 25 galduko da, hau da, 16.000 lanpostu.

Aiestaranek nabarmendu du osasun egoera dela lehentasuna da, baina "bidegabetzat" jo du erabakia, "frogatua" baitago taberna eta jatetxeek "segurtasun neurri guztiak bete" dituztela,  eta ez direla kutsatzeen "foku garrantzitsuena" izan.

“Sektoreko langile guztiak babesteko neurriak” eskatu ditu LAB sindikatuak ohar batean. “Sektorearekin lotutako jarduera guztiak pandemiak bereziki astindutako jarduera gisa aitortzea eskatzen dugu. Eta ondorioz, sektorea defendatzeko ezohiko neurriak hartu behar dira”, azpimarratu du sindikatuak.

“Ostalaritza sektorearen kriminalizazioa" gogor kritikatu du LABek agirian. “Krisi egoera honetan ostalaritza behin eta berriro kolpatzen ari dira, mugak ezarriz edo positiboen erantzule eginez. Horren atzean gobernuen kudeaketa txarra ezkutatzeko asmoa dagoela argi dugu”, salatu du sindikatuak.

“Ostalaritza sektorearekin lotutako langile eta jarduerak ugari dira: ekoizleak, hornitzaileak, garbitzaileak edo aholkulariak. Murrizketek ondorio larriak dituzte langile askorentzat. Hala ere, erabaki politikoak debekuak eta isunak arautzera mugatu dira, eta sekula ez dituzte sektorea babesteko neurriak planteatu”, gogorarazi du.

Guzti horregatik, Hego Euskal Herriko hiriburuetan egin beharreko protestekin bat egin du LABek.”Ostalaritzaren kriminalizazioaren aurrean protesta egingo dugu, eta sektoreko beharginak babesteko neurriak aldarrikatuko ditugu”, errepikatu du.

#SOSOSTALARITZA! Hacemos un llamamiento a toda nuestra clientela para que, si podéis, os acerquéis a la manifestación de este sábado, 7 de noviembre, a las 17:30h en el Boulevard donostiarra. Inoiz baino gehiago behar zaituztegu! Mila esker denoi eta zaindu! #txuleta pic.twitter.com/12qdpGKFcf

— Bar Rest Txuleta (@TxuletaRest) November 5, 2020