CCOOk, UGTk eta ITPk adostutako aurreakordioa berretsi dute langileek

Iragan ostiralean ITP Aerok eta CCOO eta UGT sindikatuek adostutako aurreakordioa berretsi dute jarraitzaileek eta militanteek batzarretan. Akordioaren arabera, Zamudioko lantegian aldi baterako kontratua duten 121 behargin kaleratuko dituzte, eta beste 42 langilek aurretiko erretreta hartuko dute.

Bi sindikatuetako iturriek jakitera eman dutenez, batzarrek aurreakordioari oniritzia eman diete gehiengo zabal batekin. Honenbestez, UGTko hiru ordezkariek eta CCOOko bik babesa emango diote ITP SAUko negoziazio mahaian. ITP SAU Zamudioko lantegi nagusiak, Ajalvirrekoak eta eta Alcobendasekoak (Madril) osatzen dute.

Madrilgo lantegietako beharginen ordezkaritzak oniritzia eman zion akordioari. Gauzak horrela, 13 ordezkarietatik hiruk ez dute aurreakordioa sinatuko, ELA sindikatuko hirurek hain zuzen ere.

Kaleratzeak eta aurretiko erretiroak

Akordioaren arabera, Zamudioko lantegian aldi baterako kontratua duten 121 behargin kaleratuko dituzte, eta beste 42 langilek aurretiko erretreta hartuko dute. 58 urtez gorakoentzat erretretak derrigorrezkoak izango dira, 50.000 euroz azpiko soldata gordinentzako % 85eko osagarri batekin, eta gainditzen dutenentzat % 75ekoa.

Guztira, 163 beharginek utziko dute Bizkaiko lantegia. Hasiera batean, zuzendaritzak 194 langile kaleratzea planteatu zuen.

Aldi baterako lan erregulazioko espedientea

Adostutako hirugarren neurria aldi baterako lan erregulazioko espedientea da. Langile guztiei eragingo die datozen 14 hilabeteetan, datorren urteko abenduaren 31ra arte.

Erregulazioa azaroaren 2tik aplikatuko da, langileek aurreakordioa berretsi ondoren.