Ostalarien eskaera aintzat hartu eta ez dute 01:30ean itxi beharko

Euskal Autonomia Erkidegoko Auzitegi Nagusiak (EAEAN) partzialki onartu du Bizkaiko eta Gipuzkoako ostalaritza-elkarteek jarritako helegitea. Helegite horretan, Eusko Jaurlaritzak agindutako gaueko aisialdiko dantza-pisten erabilera eta ordutegi-murrizketak kautelaz etetea eskatzen zuten. Beraz, ez dute goizaldeko 1:30ean itxi beharko.

Elkarte horietako iturriek EFE agentziari jakinarazi diotenez, EAEko Justizia Auzitegi Nagusiko Administrazioarekiko Auzien Salak ostiral honetan ebatzi du elkarte horiek jarritako helegitea, eta pubak eta diskotekak ixteko ordutegiei buruzko Eusko Jaurlaritzaren aginduaren betearazpena bertan behera uztea erabaki du. Hala, establezimendu horiek goizaldeko 03:00etan eta 05:00etan itxi ahal izango dituzte, hurrenez hurren.

Hala ere, Auzitegiak uko egin dio ostalariek diskoteketako dantza-pista erabiltzeko duten asmoari, eta, beraz, Eusko Jaurlaritzak establezimendu horietan dantzatzeko debekuari eutsiko dio.

Auzitegiak ez die kosturik ezartzen aldeei, eta goragoko instantzien aurrean helegitea jarri daitekeela gogorarazi du, aipatu iturriek aurreratu dutenez.

Tabernak goizaldeko 03:00ak arte ireki ahal izango dira Euskadin, eta diskotekak 05:00ak arte, Estatuko Aldizkari Ofizialean Salvador Illa Osasun ministroak eta autonomia erkidegoek gaueko aisialdirako establezimenduak ixteko hartutako erabakia argitaratzen ez den bitartean.

Espainiako Gobernuak eta autonomia erkidegoek gaueko aisialdia ixteko akordioa hartu dute ostiral honetan, eta estatu osoan nahitaez bete beharko dute.