Jaurlaritzak atzera egin du eta azokak egitea baimendu du

Tokiko azoken inguruan zegoen debekua bertan behera uztea erabaki du Eusko Jaurlaritzak eta merkatu txiki horiek euren jarduera berreskuratu ahal izango dute datotrren astetik aurrera. Hori da Estefania Beltran de Heredia Segurtasun sailburuak prentsaurrekoan iragarri duena.

Baimenarekin lotuta, Beltran de Herediak azpimarratu egin du azoketan "osasunarekin eta higienearekin zerikusia duten eta indarrean dauden neurri zorrotzak bete" beharko direla: distantziak gordetzea, eta abar. Neurri horiek "polizialak" ez direla adierazi du sailburuak, "osasun publikoarekin lotutako irizpideak" baizik, eta osasun publikoa zaintzen duten agintariek emandakoak direla gaineratu du.

Salburuak esan duenez, "egoera aldatzen ari da eta astelehenetik aurrera oinarrizkoa ez den industria jarduerak ere berriro martxan izango dira". Testuinguru horretan, Jaurlaritzak azoken inguruko araudia aldatzea erabaki du.

Jaurlaritzak aste honetan bertan erabaki zuen azokak debekatzea, eta horrek kontrako erreakzio ugari ekarri zituen; azkena, atzo bertan, ostirala. Euskal Herriko hainbat eragilek, tartean nekazaritza alorreko kooperatibek, 'Merkatuak eta azokak irekita nahi ditugu' adierazpena sinatu zuten Eusko Jaurlaritzak bertako produktuen azokak bertan behera uzteko eman zuen aginduaren aurka.

Haserrea

Sinatzaileek ez zuten ulertzen Jaurlaritzaren aginduaren arrazoia "pertsonen joan-etorriak gutxitzea eta jende pilaketa saihestea" bada, nola dauden irekita supermerkatuak: "Horietara joateko ez al da joan-etorririk egin behar? Barruan ez al da jende pilaketarik gertatzen? Nor ari da zaintzen saltoki horien barruan jendeak distantziak gordetzen dituen edota jendeak gutxieneko higiene-arauak betetzen dituen?".

Laborariek, herritarrek, alderdi politikoek eta abarrek sinatutako adierazpenean gogorarazi zuten udal azokak zerbitzu publikoa direla, eta "neurri zehatzak" har daitezkeela, Ordiziako azokan egin den moduan,"ez ordea debeku orokor bat".