Europak "aukera guztiak" zabalik ditu, COVID-19aren ondorioei aurre egiteko

Europako Batzordeak legediaren barne dauden "aukera guztiak" zabalik ditu koronabirusaren ondorio ekonomikoei aurre egiteko, Ursula Von der Leyen batzordeko presidenteak adierazpen batzuetan aditzera emandakoaren arabera. Von der Leyenek Alemaniako hedabideei egindako adierazpen batzuk argitu nahi izan ditu eta koronabonoak "eslogan bat" baino ez direla esan du.

Batzordeko arduradun nagusiak esandakoaren arabera, "errekuperazioa bermatzeko”"eta koronabirusak eragindako krisiaren ondorioei aurre egiteko, Bruselak Europako hurrengo aurrekontuan aldaketa batzuk egitea proposatuko du. "Europan Batasunaren kohesioa elkartasunaren eta erantzukizunaren bidez indarrean jarraitzen duela bermatzeko neurri batzuk proposatuko ditugu", azaldu du Von der Leyenek.

Horri jarraituta, "hitzarmenaren barruan dagoen edozein aukera" ez dutela baztertzen azpimarratu du presidenteak.

Koronabonoak "eslogan bat" baino ez dira

Von der Leyenek zehaztu egin ditu larunbatean DPA albiste agentzia alemaniarrari koronabonoen inguruan egindako adierazpenak. Koronabonoak Espainiak, Italiak eta Europar Batasuneko beste herrialde batzuek erreklamatzen dituzte zorrari aurre egiteko.

"Koronabono hitza eslogan bat da bakarrik. Horren atzean erantzukizunei lotutako gai garrantzitsua dago. Eta hor justifikatuta daude Alemaniak agertutako zalantzak", esan du Von der Leyenek.

"Muga legalak daude, eta hori ez da plana. Ez gaude horretan lanean", azpimarratu du.