Langabezia % 9,09koa izan da EAEn eta % 9,01ekoa Nafarroan 2019an

EAEn 5.300 langabe gutxiago izan dira 2019an (93.300), hau da, 2018an baino % 5,42 gutxiago, eta langabezia-tasa % 9,09koa izan da, Espainiako bigarren txikiena, Nafarroaren atzetik, Estatistika Institutu Nazionalak gaur argitaratu duen Biztanleria Aktiboaren Inkestaren arabera.

Enpleguari dagokionez, EAEn 2.700 pertsona gehiago izan dira lanean 2019an, eta kopuru hori % 0,29 hazi da ehunekotan; beraz, jarduera-tasa % 55,80koa da.

2019ko laugarren hiruhilekoan langabeziak behera egin du: aurreko hiru hilabeteetan baino 1.600 pertsona gutxiago (% 1,68), eta landunak, berriz,% 0,35 (3.300 pertsona) hazi dira.

Lurraldez lurralde, Arabak izan du langabezia-tasarik txikiena (% 7,31), Espainiako bigarren txikiena (% 7,23), eta atzetik ditu Gipuzkoa (% 7,53) eta Bizkaia (% 10,58).

Jarduera tasarik altuena Arabak du (% 56,40), ondoren Gipuzkoak (% 56,15) eta azkenik Bizkaiak (% 55, 42).

Langabezia % 9,01ekoa izan da Nafarroan

2019ko azken hiruhilekoan langabezia % 9,01ean kokatu zen Nafarroan, autonomia erkidego guztien artean tasarik baxuena.

Biztanleria Aktiboaren Inkestaren arabera, iazko laugarren hiruhilekoan % 0,93 jaitsi zen enplegua Foru Erkidegoan, aurreko hiruhilekoarekin alderatuta, baina 2019an % 1,01 hazi da.

Espainian, guztira, 402.300 pertsona gehiago enplegatu ziren iaz, hau da, 2014an susperraldi ekonomikoa hasi zenetik urteko kopururik txikiena; hala ere, Espainiako okupatuen guztizkoa 19,96 milioira iritsi da, hamaika urtean izandako mailarik handiena. 112.400 langabe gutxiago izan dira, 2012tik izan den urteko jaitsierarik txikiena, baina langabezia-tasa % 13,78ra jaitsi da, 2008tik izandako txikiena.