Osakidetzak 215 postuko eskaintza deituko du Familia Medikuntzan eta Pediatrian

Nekane Murga Eusko Jaurlaritzako Osasun sailburuak iragarri duenez, Osakidetzak 215 postuko Lan Eskaintza Publikoa (LEP) deituko du Euskal Osasun Sistemaren Lehen Arreta indartzeko. Zehazki, Familia eta Komunitate Medikuntzako 176 eta Pediatriako 39 plaza izango dira.

Iragarpena gobernu bileraren osteko prentsaurrekoan egin du Murgak. Sailburuaren hitzetan, bihar bertan aurkeztuko dute proposamena LEParen Jarraipen Batzordean (Satse, Medikuen Sindikatua eta UGT sindikatuek osatutakoa). Bileran lan eskaintza publikoaren eredu berria martxan jartzeko neurriak eta eskaintzaren datak zehazten saiatuko dira.

Aurreikuspenen arabera, azterketak 2020ko lehen seihilekoan egingo dituzte, eta asmoa da lanpostua lortzen dutenek datorren urtean bertan hastea jardunean. Maiatzean beste 46 lanpostu iragarri zituen Osakidetzak Familia Medikuntzan eta Erizaintzan.

Murgak aurreratu duenez, LEP horren ostetik beste kategoria batzuetan ere deituko dituzte eskaintzak, besteak beste, Erizaintzan.

Nekane Murga Osasun sailburuak Gobernu Kontseiluari Osakidetzaren Lehen mailako Arretarako
Lan Eskaintza Publikoaren hurrengo deialdiaren berri eman dio. Probak 2020ko lehen hiruhilekoan egingo dira @osakidetzaEJGV pic.twitter.com/Wm3WCO7xJA

— Josu Erkoreka (@jerkoreka) September 17, 2019

LEP eredu berria

Gaur iragarritako hautapen-prozesua 2018/2019 Lan Eskaintzaren baitan dago —guztira, 1.083 lanpostu—. Murgak azaldu duenez, eskaintza horrek bi helburu ditu: batetik, "enplegu egonkor eta kalitatezkoarekin" Lehen Arreta indartzen jarraitzea, eta bestetik, Lan Eskaintza Publikoaren eredu berria martxan jartzea, "prozesu eraginkor eta azkarragoekin, eta deialdi jendetsuak saihestuz".

Hain justu, hainbat eragilek egindako ekarpenak jarriko dituzte martxan hautapen-prozesu honetan. Besteak beste, Arartekoak, IVAPek, osasun arloko profesionalek, sindikatuek eta talde parlamentarioek egin dituzte gomendio eta proposamenak. Osakidetzaren LEPen eredu berria urriaren 8an aurkeztuko dute Eusko Legebiltzarrean.