EH Bildu: 'Goia berandu eta gaizki ari da turismoaren arazoaren aurrean'

Donostiako EH Bilduren iritzian, "Eneko Goiaren Gobernua berandu eta gaizki iritsi da turismoaren arazoari aurre egitera". Koalizioak salatu duenez, "legez kanpo dauden ehunka etxebizitza turistiko onartu egiten ditu" Goiak.

Ohar baten bidez EH Bilduk esan duenez, "zabalik dago" Donostiako eredu turistikoaren gaineko eztabaida, "hiriaren elkarbizitzaren eta ekintza turistikoaren nolabaiteko oreka mantendu duen eredua zaharkituta geratu baita, azken urteetako bisitari oldea dela-eta".

"Batez ere, bi dira denon ahotan dauden arazoak: masifikazioa eta ez-legezko pisu turistikoak. Alde batetik, behin eta berriz salatu dugu moduan, ez-legezko pisu turistikoen burbuilaren aurrean Goiaren gobernuak beste aldera begiratu du. Bestetik, Alde Zaharrean, eta saturazioa pairatzen duten beste eremuetan, bizi-kalitate minimo bat ziurtatu beharrean, udal gobernua kontrako norabidean ari dela salatu dute kolore guztietako auzotarrek", salatu du koalizioak.

Hori dela eta, Donostiak dituen arazoei aurre egiteko orain arte erabili den kudeaketa-ereduak "ez duela balio" azpimarratu du EH Bilduk. "Eztabaida lasaia behar da, irtenbide ahalik eta eraginkorrenak eta egokienak ezarri ahal izateko", gaineratu du.