Diru-sarrerak Bermatzeko Errenta % 8 handitzeko eskatu dute

Hainbat sindikatutako (ELA, LAB, ESK, Steilas, CGT eta CNT) eta gizarte taldetako ordezkariek elkarretaratzea egin dute, gaur goizean, Eusko Legebiltzarraren atarian, Diru-sarrerak Bermatzeko Errenta % 8 igotzeko eskatuz.

'Diru-sarrerak Bermatzeko Errenta % 8 murriztearen kontra. Murrizketarik ez' lelopean, dozenaka lagun bildu dira. EH Bilduk eta Elkarrekin Podemosek ere bat egin dute protestarekin.

Diru-sarrerak Bermatzeko Errenta KPIaren arabera igotzea proposatuko du Eusko Jaurlaritzak. Igoera horrek lanbide arteko gutxieneko soldataren igoeraren parekoa izan behar duela esan dute gaur bildutakoek.

Beatriz Artolazabal Enplegu eta Gizarte Politika sailburua Legebiltzarrean agerraldia egiten ari zen bitartean deitu dute elkarretaratzea kanpoaldean. Bere departamenduaren lan-ildo nagusiak azaldu ditu Artolazabalek Gasteizeko Ganberan.

Bilkuran parte hartu dutenek salatu dutenez, pobrezia eta bazterkeria egoeran bizi diren herritarren kopurua nabarmen hazi da EAEn azken urteotan, "Eusko Jaurlaritzak ezarritako murrizketen ondorioz".