Estatuko ekonomiak % 1 egin du gora 2015eko apiriletik ekainera

Espainiako ekonomiak % 1 egin du gora 2015eko apiriletik ekainerako tartean, urteko lehen hiruhilekoan baino hamarren bat gehiago; batez ere, demanda nazionalaren gorakadak eragin du igoera hori, gaur Estatistikako Institutu Nazionalak zabaldutako Hiruhileroko Kontabilitate Nazionalaren datuen arabera.

Halaber, 2014ko bigarren hiruhilekoko datuekin alderatuta, gorakada % 3,1ekoa da; 2015eko lehen hiruhilekoan, aldiz, % 2,7koa izan zen igoera.

Hiruhileroko hazkunde tasak zein urterokoak bat egiten dute EINek uztailaren 30ean hedatutako datuekin.

Demanda nazionalaren hazkundea

Demanda nazionalak 3,3 punturekin lagundu dio BPGren hazkundeari; urteko lehen hiruhilekoan baino bi hamarren gehiago da hori. Gainera, kanpoko demandaren ekarpenak ere egin du hobera, bi hamarren (-0,4 puntutik, -0,2ra igaro da).

Enplegua, lanaldi osoarekin baliokidetu ahal diren lanpostuez hitz eginez, % 0,9 igo da, aurreko hiruhilekoan baino hamarren bat gehiago. 2014ri dagokionez, enpleguak % 2,9 egin du gora; hortaz, horrek esan nahi du 477.000 lanpostu gehiago daudela, urte batean lanaldi osoko lanpostuez hitz egingo bagenu.