Jaurlaritzak hutsik zeuden 5.000 etxe alokairu sozialera bideratu ditu

Eusko Jaurlaritzak hutsik edo libre zeuden 5.000 etxebizitza atzeman ditu, alokairu sozialera bideratzeko, Juan Mari Aburto Eusko Jaurlaritzako Enplegu eta Gizarte Politiketarako sailburuak zehaztu duenez.

Aburtok hutsik dauden etxebizitzei buruzko jardunaldi batean eman ditu datuok, Bilbon.

Horren esanetan, hutsik dauden etxebizitzak atzematea da "etorkizunean diru publikoaz egin daitekeen etxebizitza politika bakarra".

Sailburuak zehaztu duenez, iaz 91.000 etxebizitza zeuden hutsik EAEn, hau da, etxebizitza guztien % 8,7.

Dena dela, % 8,7 horretatik, 2,7 puntu bigarren etxebizitzak edo alde baterako etxebizitzak dira. Horrenbestez, erabili gabe dauden etxebizitzak % 6 dira Euskadin.

% 6 hori da, hain zuzen ere, alokairu sozialera bideratu daitekeena. Dena dela, horietako gehienak herri txikietan daudela azaldu du Aburtok, eta eskari handiena hiriguneetan dagoela gaineratu du.

Etxebizitza horiek alokairu sozialera bideratzeko, pizgarriak eskaintzen dituzte, hala nola eraikinak zaharberritzea edo zerga salbuespenak ezartzea.