Kontseilariek luxuzko bitxi-dendatan erosketak egin zituzten

Caja Madrideko eta Bankiako kontseilari batzuek 'B' txartelekin Madrilgo luxuzko bitxi-dendatan erosketak egin zituzten, iturri juridikoek jakitera eman dutenez. Fernando Andreu Auzitegi Nazionaleko epailea 86 kontseilari ikertzen ari da.

Bankiak ez zion Banku Berregituraketa Ordenaturako Funtsari (FROB) gastu horren dokumentazioa igorri, nahiz eta akziodun nagusia izan. FROBek ustelkeriaren aurkako fiskaltzari irregulartasunaren berri eman zion. Txartelen mugimenduak CD batean jazota daude eta Bankiaren bat-egitea zein burtsako irteera ikertzen ari den auzian aztertzeko aukera izan dute akusazioek.

Guztira, zuzendaritzako kideek 15,5 milioi euro xahutu zituzten 1999tik 2012ra arte jatetxeetan, merkataritza-guneetan, hoteletan eta arropatan.

Bankiaren bat-egitea eta burtsako irteera ikertzen ari den Fernando Andreu epaileak txartelen berri ote bazuen galdetu zion Espainiako Bankuari iragan astean. Era berean, txartel horien erabilera delitua izan daitekeen aztertzeko eskatu zion.

Hamar dimisio

Fernando Serrano Andreu Madrileko Auzitegi Ekonomikoaren (TEAMM) bokalak dimisioa eman du. 'B' txartel batekin 78.500 euro gastatu zituela jakitera eman du Bankiako txosten batek. Horrela, dimisioen kopuruak gora egin du eta dagoeneko hamar dira.

Bestalde, beste entitate eta enpresa handiek "lotsaren txartelak" erabili ote dituzten ikertzeko eskatu dio PSOEk Ogasunari.

'B' txartelak erabili zituzten Caja Madrideko zuzendaritzaren 86 kideak ikertuko dituela iragarri du Ogasunak, mekanismoa aztertzeko eta ustez modu desegokian lortu zituzten diru-sarreren jarraipena egiteko, ikerketako iturriek baieztatu dutenez.