Espainiako Bankuak % 1,3ra igo du 2014rako hazkunde aurreikuspena

Espainiako Bankuak igo egin ditu 2014rako eta 2015erako hazkunde ekonomikoaren aurreikuspenak, eta % 1,3koa eta % 2koa izango dela adierazi du azken txostenean, ustez jarduera ekonomikoaren eta enpleguaren hobekuntzak bultzatuta.

Era berean, Espainiako Bankuak uste du barne-produktu gordina gehiago haziko dela Madrilek iragarritako zerga erreformari eta finantza merkatuen egonkortasunari esker.

Azken aurreikuspen horien arabera, martxoan aurreikusi zutena baino hamarren bat gehiago haziko da barne-produktu gordina 2014an, eta hiru hamarren gehiago 2015ean. Hori horrela, Espainiako Bankua Gobernua baino baikorragoa ere bada, Madrilek % 1,2ko hazkundea aurreikusi baitu aurtengorako.

Ekonomia % 0,5 hazi zen apirila eta ekaina artean

Bestalde, Espainiako Bankuak iragarri du ekonomia % 0,5 hazi zela apiriletik ekainera, urtarrila eta martxoa artean (% 0,4) baino gehiago.

Lau hiruhilekoz jarraian BPGk gora egin ostean, urte arteko tasa % 1,1 igo da.