Langabezia % 1,20 igo da Euskadin, eta jaitsi egin da Nafarroan

Euskal Autonomia Erkidegoko langabezia datuak % 1,20 egin du gora martxoan, Espainiako Enplegu eta Gizarte Segurantzako Ministerioak jakitera eman duenez. Guztira 2.112 langabe gehiago zenbatu dituzte Euskadin, eta dagoeneko 178.148 pertsona daude lanik gabe. Nafarroan, berriz, langabeziak behera egin du, guztira 52.424 pertsona zenbatu baitituzte lanik gabe; aurrekoan baino 658 langabe gutxiago.

Euskadik izan du martxoko igoerarik handiena, Melillaren atzetik (% 1,87), nahiz eta iazko martxoarekin alderatuz langabeziak zertxobait behera egin (% 0,67).

Lurraldeka, igoerarik nabarmenena Arabakoa izan da (% 2,63). Guztira, 28.777 pertsona daude lanik gabe Araban. Bizkaian % 0,95eko igoera izan da martxoan, eta 99.779 pertsona zenbatu dituzte lanik gabe. Gipuzkoan, azkenik, 440 pertsona gehiago daude langabezian; % 0,90 gehiago, hain zuzen.

Estatuan, langabeen kopuruak ere behera egin du martxoan. 16.620 pertsona gutxiago daude lanik gabe Espainian, 2006. urtetik martxoan izan den jaitsierarik handiena, hain zuzen ere. Guztira 4,7 milioi pertsona daude lanik gabe Estatuan.