Hartzekodunen konkurtsoa eskatu du Cegasak Gasteizko Auzitegian

Gasteizeko Cegasako enpresa-batzordeak ez du mobilizazioak gauzatzea errefusatu, enpresako lanpostu gehienak mantentzeko, astearte honetan hartzekodunen konkurtsoa egiteko eskaera egin ostean, batzordeko kideek jakitera eman dutenez.

Cegasak hartzekodunen konkurtsoa eskatu du astearte honetan Gasteizko merkataritza arloko epaitegian, urtarrilean aurre-konkurtsora jo ondoren. Bideragarritasun azterketa aurrera eramateko finantziazioa lortu ez duelako hartu du erabaki hori.

Horren berri astelehen arratsaldean izan zuen langile batzordeak. Sektore horretako krisiak eraginda Cegasak dituen galera handiak direla eta hartu dute erabakia, horren ondorioz egoera ekonomiko zailean murgilduta baitago.

Cegasak bere jarduera berrantolatzeko asmoa zuen eta, bazkide berriak lortzeko asmoz, hainbat negoziaketa abian zituen. Hornitzaile guztiei ordaindu eta finantza erakundeekin bere konpromisoak betetzea zen bere helburua.

Bazkide berrien laguntzarekin negozio linea bakoitzarentzat (energia biltegiak, logistika eta etxetresna elektriko txikiak) irtenbide 'independenteak' proposatzen zituen Cegasak.

Enpresak negozio unitateak saltzeko negoziaketak irekita baditu ere, ez du diru nahikoa bildu eta, ondorioz, hartzekodunen konkurtsoa eskatu behar izan du. Edonola ere, enpresako iturriek esan dute unitate batzuk saldu eta, bideragarritasun plana aurrera eramanda, enpresa zulotik ateratzeko asmoa dutela.

Cegasak 144 milioi euro fakturatu zituen 2013an, eta 2008tik galerak zituen. 900 langile inguru ditu guztira Oñatin, Gasteizen eta Txinan dituen egoitzetan, baina horietako 800 inguru Euskal Herriko lantokietan daude.

Eusko Jaurlaritzak Cegasaren proiektu globalaz fidatzen da

Josu Erkoreka Jaurlaritzako bozeramaileak Cegasaren proiektuaren jarraipenean sinisten dutela esan du, horren proiektu globalean 'esperantza' dutelako. Arabako Foru Aldundiarekin batera, prozesu guztiaren jarraipena egin dutela eta azken erabakia saihesteko ahaleginean lanean aritu direla gaineratu du.

Cegasaren berrantolaketak bankuen laguntza ezagatik "efekturik ez izana deitoratu" du. Hala ere talde guztiaren proiektu globalean sinesten dutela eta hartzekodunen konkurtsoan enpresak aurrera egitea lortuko duela adierazi du.