2014an EAEko ekonomia % 1 haziko dela kalkulatu du Confebaskek

Confebask patronalak 2014. urtean EAEko ekonomia % 1 haziko dela eta urte horren amaierarako 5.000 langabe gutxiago egongo direla aurreikusi du.

Miguel Angel Lujua Confebaskeko presidenteak Egoera Ekonomikoari buruzko Ikerketa aurkeztu du gaur, Bilboko Euskalduna Jauregian.

Horren esanetan, 2014. urtean susperraldi ekonomikoa "oso ahula" izango da, baina 2015ean "indartsuagoa" izango da.

Lujuak energiaren, fiskalitatearen, finantziazioaren eta Gizarte Segurantzaren alorretan erreformekin jarraitzeko deia egin du, enpresen kostuak gutxitzeko, baina baztertu egin du lan erreforman aldaketa "sakona" egitea.

Bestalde, lan hitzarmenen aurreraeraginaren amaiera "argitzea" eta ELAk "norabide aldaketa egin" eta negoziaziora itzultzea eskatu du.