Celaaren ustez, Aurrekontuek 'marra gorria' gurutzatu dute Hezkuntzan

Isabel Celaa PSE-EEko legebiltzarkideak Eusko Jaurlaritzak Hezkuntza arloan aurkeztutako aurrekontu proiektua gogor kritikatu du.

Eusko Jaurlaritzak Hezkuntza arloan "marra gorri" guztiak gainditu dituela azpimarratu du Celaak, besteak beste, "hirueletasuna babesten ez duelako, ezta ikerketa eta sistemaren modernitatea eta berdintasuna ere", erantsi du.

Hala, haren ustez, Jaurlaritzak aurkeztutako proiektua "atzerapauso bat" da. Urkulluren Gobernuak aurrekontu alorrean hartutako erabakiekin "zoritxarrez, Gobernu sozialistak bultzatutako hezkuntza sistemaren modernizazio prozesua geldiarazi eta apurtu" dela azpimarratu du Celaak.

Legebiltzarkide sozialistak, bestalde, ez du argitu PSE-EEk Aurrekontu Proiektuaren aurka osoko zuzenketa aurkeztuko duen ala ez. Baina Bilbon, prentsaurreko batean egindako adierazpenen arabera, litekeena da Patxi Lopezek bihar bertan esatea nola jokatuko duten.