Adegik enpresen kreditua mugitzera behartu du sistema finantzarioa

Adegi Gipuzkoako patronalak enpresen kreditua "berehala" mugitzera behartu du "sistema finantzarioa", "aringarririk gabeko panorama gogorra"ren aurrean. 2013an enpresek ixten jarraituko dutela aurreikusi du, eta martxoan langabeak 52.000 baino gehiago izango direla azaldu du.

Pello Guibelalde Adegiko presidentea eta Jose Miguel Ayerza idazkari nagusia egoera ekonomikoaz aritu dira prentsaurreko batean, Donostian, bertan, Adegik egiten duen ohiko inkestaren emaitzak ezagutzera eman dituzte.

Guibelaldek 2013rako panorama negatiboa marraztu du, patronalak lurraldeko BPG (Barne produktu gordina) % 0,7ra jaitsiko dela uste du eta langabezia 3.000 pertsona baino gehiagotan haziko dela, urteko lehen hiruhilekoa amaitzean 52.000 langabe gehiago izanda.

Gainera, kanpoko sektoreak dezelerazio nabarmena jasan du, urtarrila eta azaroa bitartean % 2,9 hazi baita, 2011ko aldi berean % 17,8 egin eta gero.

"Ezagutu dugun krisirik gogorrena nahi baino gehiago luzatzen ari da. Dagoeneko sei urte daramatzagu krisialdian murgilduta. Enpresak jota daude, eta asko, muga-mugan", Guibelalderen esanetan. Ez da ausartu esaten egoerak hobera noiz egingo duen, "inork ez baitaki", baina "esaten dena baino motelago joango da", horren iritzian.

Datuek agerian utzi dutenez, krisia hasi zenetik, orain arte, 2.000 enpresa itxi dira Gipuzkoan, eta 27.000 lanpostu galdu dira.